БиХ одби слетување на воениот авион на Сијарто

Министерот за одбрана на Босна и Херцеговина, Зукан Хелез, на 26 ноември, одбил да даде согласност за слетување на унгарски воен авион на аеродромот во Бања Лука, кој требаше да го донесе унгарскиот министер за надворешни работи, Петер Сијарто, во БиХ.

Хелез во објава на социјалните мрежи изјави дека одлуката е донесена поради „недостаток на јасно објаснување зошто шефот на унгарската дипломатија ќе пристигне во БиХ со воен авион, а не со цивилен“.

Министерот за одбрана на БиХ, според своите овластувања, одобрува прелети и слетувања на воени авиони над и во рамките на територијата на БиХ.

Тој исто така нагласи дека Унгарија континуирано му давала отворена политичка поддршка на Милорад Додик, поранешниот претседател на ентитетот Република Српска, и неговите постапки што Хелез ги оценил како штетни за суверенитетот и територијалниот интегритет на БиХ.

„Со години, унгарскиот премиер Виктор Орбан и министерот Сијарто му даваат отворена поддршка на Милорад Додик во неговите постапки што го поткопуваат суверенитетот, територијалниот интегритет и единството на Босна и Херцеговина“, изјави Хелез.

Тој нагласи дека негова обврска како министер за одбрана е да го заштити уставниот поредок и законите на државата.

„Моја должност е да го заштитам уставниот поредок, законите и интересите на Босна и Херцеговина. Затоа решив да не го одобрам овој лет, сè додека не се обезбеди целосна транспарентност и почитување на нашата држава“, рече Хелез.

Унгарија претходно изјави дека не ја признава пресудата на Судот на Босна и Херцеговина, со која Милорад Додик во август беше осуден на едногодишна затворска казна што ја откупи со пари и шестгодишна забрана за вршење јавна функција.

На денот кога Хелез одби да му даде согласност на унгарскиот министер за надворешни работи да пристигне во БиХ со воен авион, Додик се сретна со унгарскиот премиер Виктор Орбан во Будимпешта.

Доаѓањето на Сијарто го најави Додик пред неколку дена.

Унгарските власти претходно одржуваа добри односи со Додик, а официјална Будимпешта ги блокираше обидите на Европската Унија да го санкционира.

Според податоците од Министерството за финансии на БиХ, во 2022 година, Република Српска позајмила 215,5 милиони евра од унгарската EXIM банка, а на крајот на април 2025 година, долгот на ентитетот кон таа банка изнесувал околу 112 милиони евра.

Додик, по разговорите со Орбан, постојано најавуваше дека Унгарија ќе преземе и проекти чие финансирање Германија го напушти поради сецесионистичките потези на владата на Република Српска , но тоа никогаш не се случи.