Авганистанските бегалци загрижени бидејќи САД ги запреа барањата за имиграција по пукањето во Вашингтон

Соединетите Американски Држави соопштија дека ги запираат сите барања за имиграција поврзани со Авганистан откако Авганистанец застрела двајца припадници на Националната гарда, од кои едниот почина еден ден по пукањето во близина на Белата куќа.

Претседателот Доналд Трамп на 27 ноември изјави дека 20 годишната Сара Бекстром починала од повредите откако била застрелана еден ден претходно од осомничниот 29-годишен Рахманула Лаканвал кој беше идентификуван од Министерството за внатрешна безбедност.

Министерот за одбрана Пит Хегсет ја потврди смртта на Бекстром преку социјалните мрежи.

Другиот ранет член на Националната гарда, 24-годишниот Ендру Волф, „се бори за својот живот“, изјави Трамп.

Лаканвал беше ранет и се наведува дека е во критична состојба по размената на оган пред да биде уапсен од членови на Националната гарда на 26 ноември.

Трамп, кој беше во своето одморалиште во Флорида за да го прослави Денот на благодарноста во времето на нападот, го нарече пукањето „чин на зло, чин на омраза и чин на терор“.

Трамп рече дека Лаканвал пристигнал во Соединетите Држави во септември 2021 година со еден од „тие озлогласени летови“ за евакуација на Авганистанци откако Талибанците ја вратија контролата во земјата по повлекувањето на САД.

Тој додаде дека неговата администрација ќе ги „преиспита“ сите Авганистанци кои дојдоа во Соединетите Држави за време на претседателствувањето на Џо Бајден.

Агенцијата за услуги за државјанство и имиграција на САД потврди на X дека „со стапување во сила веднаш, обработката на сите барања за имиграција поврзани со авганистанските државјани е запрена на неодредено време во исчекување на натамошен преглед на безбедносните и протоколите за проверка.

„Заштитата и безбедноста на нашата татковина и на американскиот народ остануваат наш единствен фокус и мисија“.

Лаканвал служел во Авганистанската армија една деценија, поддржувајќи ги американските специјални сили во земјата разорена од војна во тој период.

Директорот на ЦИА, Џон Ратклиф, потврди дека Лаканвал работел и за ЦИА и американската војска додека бил во Авганистан.

Страв од одмазда

Авганистанците во САД изјавија дека се плашат дека пукањето ќе го зголеми притисокот врз нив и евентуално ќе ги направи мети на одмазднички напади.

„Една година сум во САД како бегалец и сè уште не сум добил зелена карта, а сега сум многу загрижен“, изјави еден Авганистанец кој моментално живее во Калифорнија за Радио Азади на РСЕ/РЛ.

„Не само јас, туку сите Авганистанци овде сме загрижени. Загрижени сме дека ќе бидеме депортирани или ќе се соочиме со други проблеми, бидејќи дојдовме тука од Авганистан со големи тешкотии. Има голема опасност за нас во Авганистан“, додаде бегалецот, кој побара да не биде именуван.

Друг бегалец кој избегал во соседен Пакистан, рекол дека шоковите од пукањето одекнале низ целиот свет.

„Продадов сè што имав во Авганистан и дојдов во Пакистан со моето семејство надевајќи се дека нашата иднина ќе се промени и дека ќе се преселиме во Америка“, рекол тој за преселбата во Исламабад откако работел со американските сили речиси две децении додека меѓународните сили ја поддржувале демократски избраната влада.

„Направивме сè што можевме, но чекавме тука во безнадежна ситуација. Треба да казнат едно лице, а не сите авганистански бегалци за неговите постапки.

Авганистанските бегалци веќе беа под притисок во Соединетите Американски Држави откако нивното ставање под Привремен заштитен статус (TPS) истече на 14 јули. Промената влијае врз околу 9.000 до 12.000 Авганистанци кои живеат и работат легално во Соединетите Американски Држави во рамките на оваа програма.

Министерството за внатрешна безбедност во соопштението изјави дека прекинувањето на TПС се заснова на проценката дека условите во Авганистан „се подобриле доволно“ и повеќе не ги исполнуваат законските барања за TПС.

Распоредување на Националната гарда

Се очекува нападот од 26 ноември, кој се случи во близина на метро станица на неколку блока од Белата куќа, исто така да стави нов фокус ВРЗ потегот на Трамп за распоредување на национална гарда во неколку големи американски градови, во наводен обид да се намали стапката на криминал низ целата земја.

Како одговор на пукањето, министерот за одбрана Пит Хегсет рече дека уште 500 членови на Националната гарда ќе бидат додадени на 2.000-те веќе стационирани во главниот град на САД.

Градоначалничката на Вашингтон, Муриел Баузер, која отворено се судри со претседателската администрација околу распоредувањето на Националната гарда во главниот град, го опиша нападот како „ужасен и несовесен“ и додаде дека „осомничениот е во притвор и ќе биде гонет според законот“.