24-nji maýda Aşgabatda Garaşsyz Döwletleriň Arkalaşygyna (GDA) agza döwletleriň hökümet baştutanlarynyň ýygnagy geçirilýär. Azatlyk Radiosynyň habarçylary, halkara çäresiniň fonunda, paýtagtda awtoulag hereketiniň bölekleýin çäklendirilýändigini habar berýärler.
Lebap welaýatynyň Türkmenabat şäherinde polisiýa işgärleri kafe-barlara aýlanyp, olaryň işine wagtlaýyn çäklendirme girizýärler. Olar munuň sebäbini “uçurym şagalaňlarynyň öňüni almak” tagallalary bilen düşündirýärler.
Hazar deňziniň kenarynda ýerleşýän Balkan welaýatynda nobatdaky dynç alyş möwsüminiň başlanmagyna sanlyja gün galanda, sebitde uçar we otly biletleriniň gytçylygy ýene ýitileşdi. Ilat kassalarda we onlaýyn bilet tapyp bilmeýän mahaly, araçylar biletleri döwlet bahasyndan 10 esse gymmada satýarlar.
Golaýda täze agyz suw desgasy açylyp, ulanylmaga berlen Aşgabat şäherinde agyz suwunyň hili ýaramazlaşdy. Krant suwlaryndan içimlik agyz suwy hökmünde peýdalanýan hojalyklar suwuň bulanmagyndan şikaýat edýärler. Bu ýagdaýa sebäp hökmünde sil suwlaryna yşarat edilýär.