Мостовой Россия рақиблари кучайаётганини таъкидлади

Россия футболи собиқ юлдузи Александр Мостовой март ойида Россия ва Мали терма жамоалари ўртасида ўтиши мумкин бўлган ўртоқлик учрашуви ҳақида фикр билдирди. Бу ҳақда euro-football.ru хабар беради.

Россия футбол иттифоқи ҳозирча Мали билан ўйинни расман эълон қилмаган, бироқ Мали футбол федерацияси вакиллари келишув борлигини айтиб ўтган. Маълумотларга кўра, учрашув 27 март, жума куни Краснодарда бўлиб ўтади.

Мостовойнинг қайд этишича, Россия термаси рақиблари даражаси сезиларли кучайган: аввал Нигерия, Перу, Чили, энди эса Мали. У шошилинч хулоса чиқаришдан кўра, йиғинга асосий футболчилар келадими-йўқми, шуни кўриш муҳимлигини таъкидлади. Шунингдек, у энди "савдо марказлари" даражасидаги рақибларга қарши эмас, анча жиддий жамоалар билан ўйналаётгани ижобий эканини айтди.

Россия терма жамоаси сўнгги йиғинни ноябрда ўтказганди: Валерий Карпин бошчилигидаги жамоа Перу билан 1:1 ҳисобида дуранг ўйнаб, Чилига 0:2 ҳисобида ютқазган. Санкциялар сабаб Россия термаси ҳозирча расмий халқаро турнирларда қатнашмаяпти.