Ак-Сайдан коопсуз жайга чыгарылгандарга жардам берилүүдө
"Биз баласы бар үй-бүлөлөргө гигиеналык каражаттарды, балдарга бут кийим жана башка кийимдерин алып бердик. Мындан тышкары балдардын, энелердин жана кош бойлуу аялдардын медициналык, психологиялык жана башка жардам алуусуна да колубуздан келишинче көмөктөштүк",- деди Назгүл Турдубекова.
Мындан тышкары аймакта Кызыл жарым ай коому, жергиликтүү бийлик жана карапайым адамдар үй-жайынан тышта убактылуу жашап жаткандарга жардам берип жатышат.
Маалыматтарга ылайык, Ак-Сайдан чыгарылган 450 чамалуу адамдын 60 чактысы №57 кесиптик лицейдин жатаканасына жайгаштырылган. Көпчүлүгүн аймактагы туугандары жана тааныштары өз үйлөрүнө алып кетишкен.
Кыргыз-тажик чек арасындагы жаңжал 13-мартта чыгып, 14-мартта да уланды. Андан кыргыз тараптан үч адамга ок тийди, тажик тарапта эки адам өлүп, бир нече киши жарадар болгону кабарланды.
«Азаттыктын» кабарчысынын айтымында, жаңжал чыккан аймакта азыр абал тынч, топтолгон эл жок, жабылган жолдор ачыла элек. (ZKo)