Узоқ умр кўрувчилар кўпроқ қаерда истиқомат қилади?
Инсоният қадим замонлардан буён узоқ умр кўриш сирларини топишга ҳаракат қилади. Америкада истиқомат қилган испан тадқиқотчиси Понсе де Мон инсон организмида “ёшлик фаввораси”, профессор Мечников “қарилик заҳри”, Сиоловский эса “ҳис этувчи ва фикрловчи атомлар” мавжуд деб ҳисоблаб, бу борада кўплаб илмий тадқиқотлар олиб боришган.
Биз билан замондош геронтологлар (умрни узайтириш билан боғлиқ фан мутахассислари) билдираётган фикрларга кўра, яқин келажакда инсонлар 200 йил, ҳатто 300 йиллаб умр кўрадилар. Уларнинг айтишларига қараганда ушбу фикрни тасдиқловчи далиллар мавжуд.
АҚШдаги қариликни ўрганиш Миллий институти олимлари томонидан очлик билан умрни узайтириш устида олиб борилган тадқиқотлар натижалари эълон қилинганда, буни кенг жамоатчилик катта қизиқиш билан қарши олди. Ярим йил мобайнида 48 нафар одам истеъмол қиладиган озиқ-овқатининг одатдаги меъёридан тўртдан бир қисминигина тановул қилиш билан чекланди. Натижалар эса уларнинг аъзоларида қаришни тўхтатиш жараёни кескин кучайганини кўрсатди.
Герентологлар фикрича, сайёрамизда энг узоқ умр кўрувчилар Абхазия, Покистондаги Хунза вилояти ва Эквадораги Вилькабамба қишлоғи аҳолиси ҳисобланади. Ҳар учала ҳудуд ҳам тоғли жойлар бўлиб, у ерларда истиқомат қилувчилар бир аср умр кўрсаларда, руҳан ва жисмонан тетиклиги билан ажралиб турадилар. Олимлар уларнинг ҳаёт тарзини ўрганишда, бу ерлик аҳолининг болаликдан бошлаб тўйиб овқатланмаслиги ва кўпинча оч юришга кўниккани маълум бўлди. Шунингдек, улар истеъмол қиладиган озиқ-овқатларнинг аксарият қисмини ҳўл мева ва сабзавотлар ташкил қилиб, асосий вақти эса тоза ҳавода жисмоний меҳнат қилиш билан ўтиши аниқланган.
Маълумотларга кўра, Японияда ҳам 100 ёшга кирганлар сони соат сайин ўсиб бормоқда. 1963 йили бу ерда 153 нафар 100 ёшга кирган одам рўйхатга олинган бўлса, ҳозирда уларнинг сони 36 минг нафардан ортиқни ташкил этади.
Узоқ умр кўрувчиларнинг ҳаёт тарзларида айрим ўхшашликлар мужассам. Масалан, уларнинг ҳеч бири ортиқча вазндан азият чекмайди. Маълумки, организмдаги тўпланган ёғлар юрак фаолиятига салбий таъсир ўтказиб, қон-томир склерози хасталигини келтириб чиқариши мумкин. Шу боисдан ҳам узоқ умр кўришнинг гарови парҳездир. Узоқ яшашнинг яна бир шартига кўра, ҳеч қачон жисмоний ҳаракат қилишдан эринмаслик керак.