Новости за 28.06.2024

Бүген, 28 июнь, һәм иртәгә, 29 июньдә, Татарстанда янә һава торышы шартлары начарлана – төньяк һәм төньяк-көнчыгыштан исүче көчле җил көтелә. Бу хакта ТР Гидрометеорология үзәге хәбәр итә.

Бүгенге көндә Казан хастаханәләрендә ботулизм йоктырган 13 кеше дәвалана. Бу хакта «Татар-информ»да узган матбугат конференциясендә ТР Сәламәтлек саклау министрлыгының баш эпидемиологы һәм иммунитетны профилактикалау буенча белгече Дмитрий Лопушов сөйләде.

Татарстан Министрлар кабинетында узган «Татнефтехиминвест-холдинг» акционерлык җәмгыяте директорлар советы утырышында Рафинат Яруллинны яңадан компаниянең генераль директоры итеп сайладылар.

Бүген «Мәгариф» һәм «Гаилә һәм мәктәп» журналларының коллективына яңа баш мөхәррир Гөлүсә Закирова тәкъдим ителде. Ул эшне ничек күзаллавы турында сөйләде.

Татарстан югары суды Тукай районының элеккеге башлыгы Фаил Камаевны тоткарлау турындагы карарны үзгәрешсез калдырды. «Татар-информ» мәгълүматын судның матбугат хезмәтендә расладылар.

Иранда вакытыннан алда Президент сайлаулар башланды. Казанда Иран Ислам Республикасы генераль консуллыгында (Спартаковская урамы, 6 йорт) иртәнге 8:00 сәгатьтән сайлау участогы эшли.

Татарстан Республикасының Тукай районы башлыгы вазифаларын вакытлыча башкаручы итеп муниципалитет җитәкчесе урынбасары Рөстәм Закиров билгеләнде. Мондый карарны бүгенге сессиядә район Советы депутатлары кабул итте.

Надежда Рагозина 2024 елның 5 июленнән Татарстан юстиция министры урынбасары вазифасыннан китә. Бу хакта ул, имзаланган боерык белән уртаклашып, социаль челтәрдәге шәхси битендә хәбәр итте.

Татарстан Милли музееның җәйге сәхнәсендә композитор Эльмир Низамов һәм җырчы Эльмира Кәлимуллинаның иҗат кичәсе булды. Концертта яңа җырларның премьералары һәм тамашачыларга билгеле булган хитлар яңгырады.

Россия мөселманнарының рухи лидеры, РФ мөселманнары диния нәзарәте һәм Россия Мөфтиләр шурасы башлыгы шәхси сәфәр белән Кырымда. Биредә мөфти шәех Равил Гайнетдин Җәмигъ мәчетендә булды, Кырым һәм Севастополь мөфтие Әмирали Аблаев белән очрашты. Россия мөселманнары башлыгын шулай ук республика хөкүмәте вәкилләре һәм руханилары каршы алды. Бу хакта Россия Мөфтиләр шурасы хәбәр итә.

Башкортстанда Россия Дәүләт сәхнә сәнгате институты һәм Башкортстан һәм Россия Мәдәният министрлыклары белән берлектә «Театр кукол под ключ» дип аталган проект гамәлгә куелган.

«Мәгариф» һәм «Гаилә һәм мәктәп» журналларының яңа баш мөхәррире Гөлүсә Закирова булачак. Ул бүген коллективка тәкъдим ителде.

РФ Президенты Владимир Путин мәктәпне тәмамлаучы чыгарылыш сыйныф укучыларына котлау сүзләре белән мөрәҗәгать итте. Чыгарылыш кичәләренә багышланган видеомөрәҗәгатьне Кремльнең матбугат хезмәте чыгарды.

Аксубай районының «Барин Енорускин III авыллыгы» ачыкланган мәдәни мирас объектлары реестрына кертеләчәк. ТР Мәдәни мирас объектларын саклау комитеты боерыгының проекты коррупциягә каршы экспертиза уза.

Боливиядә дәүләт хакимиятендә кискен борылыш ештыру омтылышлары булу сәбәпле, Россия илчелеге Россия гражданнарына бу илгә барудан кыска вакытка тыелып торырга киңәш итте. Бу хакта «РИА Новости» хәбәр итә.

Бүген Татарстан синоптиклары аязучан болытлы һава торышы фаразлады. Урыны белән бераз яңгыр явачак. Бу хакта ТР Гидрометеорология үзәге хәбәрендә әйтелә.

Журналистлар һәм блогерлар өчен «ЛЕС-ПРЕСС» II Бөтенроссия конкурсына гаризалар кабул ителә. Аны Федераль урман хуҗалыгы агентлыгы оештыра. Бу турыда Татарстан Урман хуҗалыгы министрлыгы хәбәр итте.

Самараның «Бердәмлек» газетасында Эльмира Сәйфуллинаның «Чүкеч, энә һәм мамык аның инструментлары иде» дигән язма чыкты.

Башкорт дәүләт курчак театры «Шомбай fest» халыкара курчак театрлары фестиваленә рус телендә уйналучы «Сабантуй» спектаклен алып килгән. Театр директоры, режиссер Альберт Имаметдинов әйтүенчә, бу яңа спектакль һәм ул әле башкорт теленә тәрҗемә ителеп өлгермәгән.

Әлмәттән чыгарылыш укучысы соңгы өч елда Татарстанда беренчеләрдән Бердәм дәүләт имтиханы буенча 300 баллы булды. Бу хакта «Әлмәт таңнары» республика мәгариф министрлыгының матбугат хезмәтенә сылтама белән хәбәр итә.

29 июнь көнне Россиядә яшьләр көне уңаеннан Мөслимдә велойөреш уза. Велойөреш 18.00 сәгатьтә «Мөслим йөрәге» скверыннан старт ала. Бу хакта «Мөслим-информ» хәбәр итә.

Бу көннәрдә Зәйнең «Җылы Зәй» хәйрия фонды, шәһәр сәүдә нокталарында махсус хәрби операциядә катнашучылар өчен озак саклана торган азык-төлек җыюга махсус кәрзиннәр куюны оештырды. Бу хакта «Зәй яңалыклары» хәбәр итә.

Лениногорск ЗАГС бүлегендә махсус хәрби операция зонасында хезмәт итүче якташ хәрбинең никахлашу тантанасы узды. Бу хакта «Заман сулышы» сайтында Розалия Мостафина яза.

2024 елның 24 июне 13 пар өчен үзенчәлекле көн булды. Нәкъ менә шушы матур көнне алар Түбән Кама ЗАГСында мөнәсәбәтләрен законлаштырдылар. Бу хакта Түбән Кама муниципаль районы рәсми сайтында хәбәр ителә.