Татарстанда алдан тавыш бирүдә катнашучыларны теркәү төгәлләнде
Татарстанда “Бердәм Россия” партиясе вәкиле буларак Россия Дәүләт Думасына депутат булып сайланырга үз кандидатурасын тәкъдим итүчеләр арасында алдан тавыш бирүдә катнашучыларны теркәү тәмамланды.
Россиядә “Бердәм Россия” партиясе оештырган алдан тавыш бирү көне 22 майга билгеләнде. 10 апрельдә алдан тавыш бирүдә үз көчен сынап карарга, кандидатлыкка кандидат булырга теләгән кешеләрдән документлар кабул итү төгәлләнде. Татарстанда барлыгы бүгенге көндә 69 кандидат теркәлде.
Алдан тавыш бирүне үткәрү буенча төбәк оештыру комитетында 11 апрельдә уздырылган утырышта соңгы китерелгән документлар тикшерелде. Оештыру комитеты Россия финанс министры урынбасары Айрат Фәрраховны, Иҗтимагый палата әгъзасы Фәрит Хуҗинны, ТР Милли китапханәсе хезмәткәре, танылган блогер Тимур Тимуршинны, “НПО ВС” ҖЧҖ юнәлеш җитәкчесе Александр Летуновскийны, “Эко БилД” ҖЧҖ генераль директоры Рушан Нәҗметдиновны, юрист Гомәр Насыйбуллинны теркәде. Өч кешенең документлары кире кагылды. Шулай ук документлардагы төгәлсезлекләре аркасында исемлектән берьюлы сигез кандидат төшереп калдырылды. Аларның күбесе беркайчан да хөкемгә тартылмаулары турында белешмә кәгазен алып килергә өлгермәгән иде.
Төбәк оештыру комитеты җитәкчесе Юрий Камалтынов белдергәнчә, бүген Россия Дәүләт Думасына сайлауларда алдан тавыш бирүдә катнашучыларның исемлеге тәгаенләнде. Алар 69 кеше: 46 кандидат – федераль округ буенча, 39 кеше – бермандатлы округтан һәм 16 кеше исемлек һәм округ буенча теркәлгән. 15 апрельгә кадәр кандидатларның фамилияләре федераль оештыру комитетына хәбәр ителәчәк, исемлек андагы утырышта расланачак.
“Бүген без алдан тавыш бирүнең беренче этабына йомгак ясадык. Исемлек төзелде, әмма әле 22 майга кадәр ул үзгәрергә, бәлки кайбер кешеләр үз кандидатурасын алырга да мөмкин. Хәзер безгә 22 майда – алдан тавыш бирү көнендә сайлаучыларга бирелә торган бюллетеньнәр өстендә эшләргә кирәк”, – дип искәртте Юрий Камалтынов.
Исегезгә төшерәбез, 22 майда Татарстанда 560 исәпләү участогы эшләячәк. Алдан тавыш бирү нәтиҗәләренә карап, РФ Дәүләт Думасына “Бердәм Россия” партиясеннән тәкъдим ителәчәк кандидатлар исемлеге төзеләчәк.