Դավիթ Տոնոյան. Հայկական բանակը պատրաստ է ցանկացած սցենարի
ՀՀ պաշտպանության նախարարի առաջի տեղակալ Դավիթ Տոնոյանը գրողների հետ հանդիպմանը հերթական անգամ հայտարարեց՝ սահմանին տեղի ունեցողն այլևս հրադադարի խախտում չէ, ըստ այդմ՝ հակամարտող կողմերի միջև առկա վիճակը զինված դիմակայություն է:
«Մեր ջանքերն ուղղված են լայնամասշտաբ պատերազմի դիմակայմանը, ինչպես նաև թույլ չտալուն, որ ղարաբաղյան հակամարտության կարգավորման բանակցային գործընթացը շարունակվի ռազմական գործողություներին զուգահեռ»,-շեշտեց նա:
Արձակագիր Ռուզան Ասատրյանի հակադարձմանը, թե նավթի գների անկման հետևանքով Ադրբեջանը տնտեսական ծանր վիճակում է հայտնվել, ինչից ելնելով որոշ փորձագետներ չեն բացառում, որ ներքին իրավիճակը փրկելու համար Ադրբեջանի ռազմաքաղաքական վերնախավը կարող է վերսկսել պատերազմը, Դավիթ Տոնոյանը վստահեցրեց, թե ռազմավարական վերանայման գործընթացը ենթադրում է սպառնալիքների գնահատում և դեռևս առաջին շրջափուլում՝ 2008-2010թթ-ին, կանխատեսվել էր, որ հնարավոր է Ադրբեջանում տնտեսական խնդիրներ առաջանան կապված նավթի գների հետ:
«Զինված ուժերում իրականացվում է պլանավորում բոլոր սցենարներով, այլ կերպ՝ պատերազմի վերսկսման հնարավորությունն ի սկզբանե հաշվարկված է և համապատասխան գործողություններով պլանավորված: Ժամանակի ընթացքում կարող է սոցիալական իրավիճակը սրվել կամ սառեցվել, բայց զինվորականների համար դա մեծ նշանակություն չունի, եթե ադրբեջանական ռեժիմը գնա պատերազմի, մենք պատրաստ ենք և՛ այսօր, և՛ վաղը»,-ասաց պաշտպանության փոխնախարարը:
Այս համատեքստում Դավիթ Տոնոյանը շարունակեց՝ մեր բանակը զինվորների քանակի բանակ չէ, այն խելացի գործող բանակ է՝ հաշվի առնելով երկրի աշխարհագրական դիրքը, ավելին՝ ՀՀ-ի և Արցախի հատվածում առաջնագծի կահավորվածության առումով դոմինանտ դիրքում ենք հակառակորդի նկատմամբ:
«Հակառակորդի դեմ զսպման համակարգ ստեղծելու համար մեր ռեսուրսն ավելի քան բավարար է»,-ընդգծեց նա՝ նկատելով, որ 1994-ից սկսած տասնյակ հազարավոր զորացրվածներ առաջնագծում են ծառայել, որոնք գիտեն, թե ինչ է նշանակում սպառնալիք: Իսկ այսօր ադրբեջանական զինուժը ոչ այնքան դիպուկահար կրակի է դիմում, կամ առաջվա պես հետախուզա-դիվերսիոն գործողություններ իրականացնում, այլ խոշոր տրամաչափի զինատեսակներ և ծանր զինտեխնիկա օգտագործում:
«Մեծամասամբ կիրառվել է ականանետային կրակ, ընդ որում՝ ամենափոքրից սկսած ամենամեծով վերջացրած: Այս շինությունը 2-3 120 միլիմետրանոց ականի ընկնելուց կոչնչանա, նման լուրջ միջոց է կիրառվում: Դրանից հետո հրետանի օգտագործվեց, հրթիռային համազարկային միջոցներ, մի քանի անգամ տանկեր: Այսինքն` Ադրբեջանն էսկալացիայի է գնում, և այս պայմաներում, ցավոք, զոհերը շատանում են: Բայց պետք է ասեմ, որ համապատասխան միջոցներ ենք կիրառում և հակառակորդը զսպվածություն է ցուցաբերում»,-ամփոփեց ՀՀ պաշտպանության նախարարի առաջին տեղակալը: