Նոր մոտեցումներ առաջարկելու փոխարեն՝ Լավրովը հղում էր կատարում նախկինում բանակցված և կյանքի չկոչված փաստաթղթերի վրա, ինչը մտահոգիչ է․ քաղաքագետ
Քաղաքագետ, տարածաշրջանային անվտանգության հարցերով փորձագետ Հրանտ Մելիք -Շահնազարյանի համոզմամբ՝ ՌԴ արտգործնախարարի այցը տարածաշրջան միանշանակ պայմանավորված է երկրների հետ դիվանագիտական հարաբերություններ հաստատելու 25-ամյակով:
Նա Tert.am-ի հետ զրույցում նկատեց, որ, իհարկե, ակնկալվում էր, որ ՌԴ արտաքին գերատեսչության ղեկավարը Հայաստանում և Ադրբեջանում կանդրադառնար Լեռնային Ղարաբաղի կարգավորման գործընթացին: Ամփոփելով արդեն նրա այցն ու այցելության ընթացքում արած հայտարարությունները՝ Հրանտ Մելիք-Շահնազարյանը նշեց. «Իհարկե Լավրովը փորձում էր առարկայական խոսել, բայց ի վերջո, ինքն էլ խոստովանեց, որ ղարաբաղյան հիմնահարցի հետ կապված շատ լավատես պետք չի լինել․ հարցը բարդ է, և շատ կոմպոնենտներ է պարունակում, աշխատանք է պահանջում»:
Փորձագետը ափսոսանք հայտնեց, որ այդպես էլ Լավրովից որևէ առաջարկ չհնչեց:
Հրանտ Մելիք-Շահնազարյանի խոսքով՝ ցանկալի կլիներ, որ ապրիլյան պատերազմից հետո, երբ փոխվել է իրավիճակ, պետք է առաջարկներն էլ փոխվեն: «Բայց նոր մոտեցումներ առաջարկելու փոխարեն՝ Լավրովը փորձում էր հղում կատարել նախկինում բանակցված և կյանքի չկոչված փաստաթղթերի վրա, առաջ էր քաշում այլ ռազմաքաղաքական իրադրությունում ձեռք բերված առաջարկություններ, և վերակենդանացնելու փորձ էր կատարում, ինչը մտահոգիչ էր»,- ասաց նա՝ հավելելով, որ իրականում ապրիլյան պատերազմից հետո միջազգային հանրության կողմից պետք է մշակվեն Ադրբեջանին ճնշելու մեխանիզմներ:
Քաղաքագետը մեծ տարբերություն չգտավ ադրբեջանական և հայկական լսարանների առջև արած Լավրովի հայտարարությունների միջև: Նշեց, որ միակ բանը, որ նկատելի էր, ընդհանրական հայտարարություններն էին:
«Սուր հարցադրումներին ռուսական կողմը կոնկրետ պատասխաններ չունի: Իրականում չեն էլ աշխատել այդ ուղղությամբ, և, ըստ էության, խաղաղության մակարդակը, որ այսօր գոյություն ունի ,բավարարում է բոլոր միջնորդներին: Բոլորի արածը «բարի ցանկությունների ոլորտից են», հստակ քայլեր ոչ ոք չի անում»,- ասաց նա:
Անդրադառնալով մինչ ՌԴ արտգործնախարար Սերգեյ Լավրովի այցը եղած քննարկումներին, թե նա գալիս էր տարածաշրջան Էրդողան-Պուտին հանդիպման ժամանակ եղած քննարկումները Հայաստանին և Ադրբեջանին ներկայացնելու համար, քաղաքագետը նշեց, որ բոլոր նման մեկնաբանությունները հիմնված են եղել լրագրողի կամ փորձագետների ենթադրությունների վրա:
«Որևէ հիմք, որ Ռուսաստանն ու Թուրքիան քննարկումներ կամ առավել ևս պայմանավորվածություններ են ունենում ղարաբաղյան հիմնախնդրի հետ կապված, չկա: Եթե նման հիմք լինի էլ, ապա միանշանակ պարզ է, որ դրանք բավարար չեն, որ հայկական կողմը հետևի այդ պայմանավորվածություններին: Մենք գիտենք, որ կան առաջարկներ, որ ընդունվել են հայկական կողմից, եղել են առաջարկներ, որոնք մերժվել են: Այստեղ կարևորը մեր դիրքորոշումն է: Իսկ դրա մասին շատ լավ խոսում են մեր երկրի ղեկավարը և նաև արտգործնախարարը․ եթե ժամանակին խոսվում էր զիջողականության մասին՝ տարածքների, բացառությամբ Լաչինի շրջանի, հիմա բացառությունը այն տարածքներն են, որոնք չեն կարող սպառնալ Արցախի անվտանգությանը: Ձևակերպումներ են փոխվել»,- ասաց նա: