Елорда іргесіндегі Тәуке ханның ордасы: Тарихи ескерткішті сақтап қалу маңызды

АСТАНА. ҚазАқпарат - Елбасы Нұрсұлтан Назарбаевтың елорданың іргесіндегі Тәуке ханның жазғы ордасы жайлы сөз қозғауы - тарихшылардың үміт отын тұтатып отыр. Түркістанды қыстап, Арқаны жайлаған қазақ хандарының ізімен Күйгенжарда жазғы ордасын тіккен Әз Тәуке ханның ізі қалған жердің табылуы, расында да, ғажап та қуанышты жаңалық. Ал осынау хан ордасының орны қалай табылды? Нақты қандай дәлелдер тарихшылардың тұжырымына негіз болып отыр? Тарих ғылымдарының докторы, Л.Н.Гумилев атындағы ЕҰУ-нің профессоры Жамбыл Артықбаевпен бірге Күйгенжарға арнайы барған сапарымызда оқырман қауымға осы сұрақтардың жауабын білмекке бекіндік.