Թուրքիան դադարեցրել է երկիր ժամանող սիրիացի ներգաղթյալների գրանցումը․ Human Rights Watch
Human Rights Watch միջազգային իրավապաշտպան կազմակերպությունն ահազանգել է, որ Թուրքիան սկսել է չգրանցել երկիր ժամանող սիրիացի նոր ներգաղթյալներին։
Կազմակերպության պաշտոնական կայքում նշվում է, որ չհաշված որոշակի բացառությունները՝ Թուրքիայի իշխանությունները փաստացի դադարեցրել են պաշտոնապես գրանցել երկիր ժամանած սիրիացիներին։
HRW-ն մտահոգություն է հայտնել, որ նման քայլը կարող է հանգեցնել Թուրքիայից սիրիացի ներգաղթյալների ապօրինի արտաքսմանը, նրանց հասանելիք առողջապահական ծառայություններից օգտվելու հնարավորությունից զրկվելուն ու անգամ՝ բռնի կերպով Սիրիա վերադարձվելուն։
Միջազգային իրավապաշտպան կազմակերպությունը հիշեցրել է նաև սիրիացի ներգաղթյալների կարիքները հոգալու համար Եվրամիության տրամադրած 3 մլրդ եվրո օգնության մասին։
Ըստ HRW-ի՝ Եվրոպայի իրական նպատակն է միմիայն արգելակել սիրիացի ներգաղթյալների՝ Թուրքիայից ԵՄ տարածք հասնելը, ինչի պատճառով էլ նրանք հաճախ աչք են փակում ներգաղթյալների հանդեպ Թուրքիայի իշխանությունների արած անընդունելի քայլերի կամ այդ երկրում բնակվող սիրիացիների կրած դժվարությունների ու արժանացած վատ վերաբերմունքի հետ կապված խնդիրների վրա։