Putinniñ Qırımda «referendum» teşkil etilgenine dair sözlerini mahkemede qullanmaq kerek – Geraşenko
«Matbuat konferentsiyasında (Rusiye prezidenti Vladimir Putin ve ABD prezidenti Donald Trump – muarairiyet) yañğırağan eñ muim şey, Putin qabaatını bildirip kelgeni ve Qırımda «referendumnı» Rusiye teşkil etkenini tanığanıdır. Bizim uquqçı ve diplomatlar bu itirafnı halqara mahkemelerde dava açqanda qullanmaq kerek», – dep yaza Geraşenko Facebookta.
Onıñ sözlerine köre, ayrıca, Putinniñ Trump Qırım ilhaqını tanımağanını itiraf etkeni muim.
«Bizim içün: Qırım ilhaqını tanılmaması, Donbassnıñ işğali, Ukraina sıñırlarınıñ bozulğanı ve bunıñ içün Rusiye mesul olğanı meselelerinde Senat, Kongress, Devlet departamenti, Pentagon, Beyaz ev, cumhuriyetçi ve demokratlarnıñ birlik ve birdemligi pek muim. NATO sammiti beyanatı altında Trumpnıñ imza atıp, Rusiyege qarşı sertlik köstergeni pek muim. Diger eki taraflama körüşüvler lâğu etilip, prezident Poroşenkonen ve sammit arfesinde Putinnen körüşkeni de», – dep qayd etti birinci vitse-spiker.
İyülniñ 16-nda Rusiye prezidenti Vladimir Putin ABD prezidenti Donald Trumpnen ötkergen körüşüvi neticesinde ötkerilgen matbuat konferentsiyasında, ABD prezidenti Qırımnıñ qanunsız ilhaq etilgeni pozitsiyasında turğanını bildirdi.
«Trumpnıñ Qırımnen bağlı pozitsyası belli, o ondan qaytmay ve Rusiyege qoşulğanı qanunsız dep ayta. Bizim pozitsiyamız farqlı. Bizler referendumnı halqara aq-uquqqa uyğun şekilde keçirdik dep sayamız», – dedi Putin.
Aynı zamanda Trump Qırımnen alâqalı sualge qarşılıq köstermedi.
2014 senesi martnıñ 16-nda Qırımda Ukraina ve dünya tarafından tanılmağan «referendum» ötkerildi. Rusiye tarafdarı olğan Qırım ükümeti iddia etkenine köre, iştirakçilerniñ 97 faizi Rusiye terkibine kirmek içün rey bergen eken.