İsmail Ramazanov: Küreşiñizni toqtatmañız

İsmail Ramazanovnıñ FSB, politsiya ve mahkemelerniñ zulumı ve yüzsüzligine qarşı açlıq ilân etken siyasiy mabüs Oleg Sentsov, Volodımır Baluh ve Emir-Usein Kukuğa qol tutıp yazğan mektübi.


Üriyet oğrunda küreşip boysunmağan, eñ adaletli ve ateşli küreşçiler, Qırım Rusiye ihtiyarına kirgen soñ Rusiyede olıp keçken şeyler boyunca öz fikirlerini bildireler. Olar Qırımda olarğa qarşı yapılğan işbu emsalsiz tazyıqqa bütün dünyanıñ diqqatini çekmek içün mecburen açlıq ilân eteler.


Parmaq işaretinen idare etilgen mahkemeler tarafından beş, on, on beş ve ondan ziyade bir müddetlik apis cezasına mahküm etilüv – fikir ve söz serbestligi içün tölengen deşet bir fiyattır.





Parmaq işaretinen idare etilgen mahkemeler tarafından mahküm etilüv – fikir ve söz serbestligi içün tölengen deşet bir fiyattır





Sentsov, Baluh ve Kuku kibi fikir yürsetkenler – pek çoq, lâkin çoqsunıñ butün dünyağa öz fikrini beyan etecek cesareti ve iradesi yetmey, amma bizler boysunmağan arqadaşlarımızğa çoq minnetdarmız.


Sağlığını havf altına alıp, Allah köstermesin, atta ayatiy telükesi ola turıp olar Qırımda olıp keçken şeylerge diqqat çekeler.


Dostlar, qardaşlar, dayanıñız. Yañğız olmağanıñıznı biliñiz, yüzlerce, biñlerce fikirdeşleriniz hayalen siznen beraberler. Küreşiñizni toqtatmañız.


Aqiqat ve Adalet bizim tarafımızda.


İsmail Ramazanov, Qırımda rusiyeli akimiyet tarafından taqip etilgen qırımtatarı


«Fikir» rubrikasında ifade etilgen fikirler muelliflerniñ öz fikirlerini aks etip, er vaqıt muarririyetniñ fikrini aks etmey bileler