«Ելք» դաշինքի ձևաչափով Երևանի ավագանու ընտրություններին հանդես գալու հարցը քննարկման փուլում է. Տիգրան Ավինյան

Վերջնական որոշում կայացնելուց առաջ դեռևս քննարկումների մեկ փուլ ունենալու ենք. ՔՊ վարչության նիստի ավարտից հետո լրագրողների հետ զրույցում այս մասին ասաց ՀՀ փոխվարչապետ Տիգրան Ավինյանը:

Ըստ նրա՝ քննարկումներն արժեքավոր էին, լսել են Երևանի քաղաքապետի պաշտոնում ինքնաառաջադրված երկու թեկնածուների՝ քաղաքի զարգացման վերաբերյալ ունեցած պատկերացումները և հաջորդ փուլին արդեն լսելու են մյուս  թեկնածուներին նույնպես, հարցեր տալու և ըստ այդմ էլ կայացնելու որոշում:  

«Հիմնականում ամեն թեկնածու իր պատկերացումներն էր ներկայացնում քաղաքի զարգացման տեսլականի վերաբերյալ, կոնկրետ դրույթների վերաբերյալ: Շատ ընդարձակ քննարկում էր, հարցուպատասախանի ֆորմատ նույնպես կար: Հիմնական ծրագրային դրույթների վրա ենք ուշադրություն դարձնում»,- ասաց նա:

Հարցին, թե հնարավոր է՝ թեկնածուները վարչության պահանջներին չբավարարեն, Տիգրան Ավինյանն ասաց, որ դեռևս թեկնածուների առաջադրման ժամանակ կա, հետևապես կարող են ունենալ նոր թեկնածուներ ևս:

Իսկ թե ինչպես կմասնակցեն՝ դաշինքով, թե առանց, Տիգրան Ավինյանը նշեց, որ «Ելք» դաշինքի ձևաչափով հանդես գալու հարցը քննարկման փուլում է: «Հստակ պատասխան տալ չեմ կարող»,- ասաց նա:

Հիշեցնենք, որ ՔՊ–ի՝ Երևանի քաղաքապետի 4 թեկնածուներն են Ալեն Սիմոնյանը, Հայկ Մարությանը, Զարուհի Բաթոյանը և Սրբուհի Ղազարյանը: