Pussy Riot topary bir türkmen agzasynyň Horwatiýada tussag edilendigini aýdýar
Horwatiýanyň “Weçernyý list” neşiri dünýä belli Pussy Riot feminist aýdym-saz toparynyň türkmen agzasy bolan Aýsoltan Nyýazowanyň Türkmenistanyň haýyşy esasynda horwat serhedinde polisiýa tarapyndan tussag edilendigini habar berýär. Maglumata görä, Nyýazowa häzirki wagtda Türkmenistana ekstradisiýa edilmek howpy abanýar.
Neşiriň Pussy Riot agzalaryna salgylanyp habar bermegine görä, Türkmenistan 2002-nji ýylda Interpola ýüz tutup, Aýsoltan Nyýazowany “gyzyl duýduryş” bilen gözlenýänleriň sanawyna goşupdyr.
Aýdylmagyna görä, Nyýazowa Türkmenistanda ýurduň Merkezi bankyndan millionlarça dollar pul ogurlamakda aýyplanýar.
Pussy Riot agzasy Olga Borisowa özüniň Instagram sahypasynda türkmenistanly aýalyň tussaglygy barada gürrüň berýär. Onuň sözlerine görä, Nyýazowa 2000-nji ýyllarda Türkmenistanda Merkezi bankdan pul ogurlamakda aýyplanandan soňra, Şweýsariýa gaçyp barýar we ol ýerde 2011-nji çenli ýaşaýar. Soňra rus häkimiýetleri Türkmenistanyň haýyşy esasynda Şweýsariýadan Nyýazowanyň Russiýa ekstradisiýa edilmegini haýyş edýär. Russiýanyň bu eksradisiýa haýyşy kanagatlandyrylandan soňra, Nyýazowa Russiýa getirilýär we bäş ýyl möhlet bilen türme tussaglygyna höküm edilýär. Ol ýerde türkmenistanly aýal Pussy Riot agzalary bilen tanyşýar.
Maglumata görä, Pussy Riot agzasy Russiýada türme möhletini tamamlap, pasport alýar we Şweýsariýa gaýtadan dolanýar. Ol şu wagta çenli feminist toparyň çärelerine işjeň gatnaşyp gelýän ekeni.
Borisowanyň sözlerine görä, Aýsoltan Nyýazowa ilkibaşda, geçen hepde, Sloweniýada saklanýar we 10 sagat tussaglykdan soňra kazyýet karary bilen boşadylýar.
Topar birnäçe gün mundan ozal, Ýewropa aýdym-saz turunyň çäginde Sloweniýadan Horwatiýa geçmekçi bolanda horwat häkimiýetleri Türkmenistanyň 2002-nji ýylda Interpola beren ýüz tutmasy esasynda, Aýsoltan Nyýazowany serhetde tussag edýär.
Maglumata görä, häzirki wagtda horwat kazyýetiniň saklanan türkmen zenanynyň Türkmenistana ekstradisiýa edilip-edilmezligi babatda karar kabul etmegine garaşylýar.
Pussy Riot topary dünýäde feminist protest aksiýalary bilen giňden tanalýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.