Чемезов Путинга Казанда чүп яндыру заводы төзелешен туктатып тору турында хәбәр итте

«Ростех» дәүләт корпорациясенә Казанда калдыкларны энергетик утильләштерү заводын һәм Мәскәү өлкәсендә шундый ук ике предприятиене төзүне «яхшырак вакытларга кадәр» туктатып торырга туры килә. Бу хакта дәүләт корпорациясенең генераль директоры Сергей Чемезов Россия Президенты Владимир Путинга сөйләде, дип хәбәр итә Кремль матбугат хезмәте.

«Ростех» башлыгы билгеләп үткәнчә, Мәскәү өлкәсендә дүрт һәм Татарстанда бер чүп яндыру заводы төзелеше 2019 елда ук башланган, әмма процесс коронавирус пандемиясе һәм махсус хәрби операция башланганнан соң кертелгән санкцияләр аркасында туктатылган. Чүп яндыру заводларының беренчесен «2024 елның декабрендә генә» тапшыра алганнар.

«Бурычыгыз бар, Сергей Викторович», - диде дәүләт башлыгы җавап итеп. Чемезов моны таныды һәм хәзерге вакытта әзерлеге 92 процент тәшкил иткән икенче завод киләсе, 2026 елда тәмамланачак, дип ышандырды.

«Калган өч заводны – Мәскәү өлкәсендәге ике заводны, Казандагы бер заводны «арзанрак» акчалар булган яки дәүләт ягыннан ниндидер ярдәм күрсәтелгән вакытка кадәр туктатып торырга мәҗбүрбез», - дип ассызыклады Дәүләт корпорациясе җитәкчесе.

Барлык чүп яндыру заводларын төзү эшләре шәхси инвестицияләр һәм «Ростех»ның үз акчалары хисабына алып барылды, дип игътибар иткән иде элегрәк Чемезов. «<...> нигездә бу, әлбәттә, кредит акчалары [иде]», - дип ачыклык кертте ул.

Агымдагы елның гыйнвар аенда Осиново бистәсендә чүп яндыру заводы төзү проектын гамәлгә ашыру белән шөгыльләнүче «РТ-Инвест» компаниясе предприятие көзен Кытайдан кирәкле җиһазлар китертә башлаячак, предприятие 2027 елда гына эшли башлаячак, дип хәбәр итте.

Моңа кадәр бер атна элек Татарстан Рәисе Рөстәм Миңнеханов РФ вице-премьеры Дмитрий Патрушевка чүп яндыру заводы төзелешенең барышы турында сөйләде. Аннан соң алар бергәләп төзелеш мәйданчыгын карады. Ул вакытта объектның әзерлеге 24 процент тәшкил итә иде.