“Манчестер Сити”да жиддий йўқотиш: Эчеверри мусобақани муддатидан олдин тарк этди

Клублар ўртасидаги жаҳон чемпионатида иштирок этаётган Англиянинг етакчи жамоаси — “Манчестер Сити” мусобақа давомида катта йўқотишга учради. Жамоа бош мураббийи Хосеп Гвардиоланинг сўзларига кўра, эндигина асосий таркибга жалб этилган ва ўзининг порлоқ дебюти билан мухлислар эътиборини тортган аргентиналик ёш ҳужумчи Клаудио Эчеверри турнирнинг қолган қисмида майдонга туша олмайди.

Эслатиб ўтамиз, 19 ёшли Эчеверри жаҳон чемпионатидаги биринчи ўйинини “Ал-Айн”га қарши ўтказган ва бу беллашувда дарвозани ишғол қилиб, ўз ҳисобини очган эди. Унинг ҳаракатларидаги ёшликқа хос қўрқмаслик, майдондаги эркин ҳаракатлар мураббийлар ва мухлислар томонидан ижобий баҳоланганди.

Бироқ мусобақанинг давом этиши арафасида ёш футболчининг жароҳат олгани ва энди у сафдан чиққани маълум бўлди. Бу ҳақда Гвардиола матбуот анжуманида шундай деди:

“Клаудио Эчеверрининг тўпиғида муаммо бор. Унинг жароҳати биз учун жиддий йўқотиш. Жароҳатдан тўлиқ тикланиши учун камида икки-уч ҳафта вақт керак бўлади. Бу биз учун жуда афсусли ҳолат. У катта истеъдод эгаси, лекин афсуски, бу турнирда ундан фойдалана олмаймиз”.

Мутахассиснинг сўзларига кўра, “Ювентус”га қарши навбатдаги учрашувда жамоа янги футболчиларни синовдан ўтказади. Бундан ташқари, иккинчи бўлимда бир қатор алмашувлар бўлиши режалаштирилмоқда.

“Биз 90 дақиқа давомида юқори темпда ўйнай олмаймиз, айниқса шундай йўқотишлардан сўнг. Шу сабабли, майдондаги энергияни тўғри тақсимлаш учун алмашувларга таянамиз”, — деди Гвардиола.

Эчеверрининг мусобақадан четда қолиши “Сити”нинг ҳужумдаги вариантларига таъсир кўрсатиши мумкин. Аммо бу вазият бошқа ёш истеъдодлар учун ўзини кўрсатишга муҳим имконият яратади.