Alliansen får avslag på 16 valliste-klager

Riksvalsstyret avslår 16 klager frå partiet Alliansen.

Dermed får ikkje partiet stille lister i eit einaste valdistrikt i samband med haustens stortingsval.

I juni klaga partileiar Hans Lysglimt Johansen avslaga frå 16 distriktsvalstyre til riksvalsstyret. Årsaka til avslaga var at partilistene hadde for få underskrifter til å bli godkjent og somme stader var det for få namn på vallista.

Klageinstansen har i møte i sommar avvist alle klagene frå Alliansen – Alternativ for Noreg fordi det ikkje er klaga inn til rett organ innan klagefristen.

Lysglimt Johansen blei i fjor dømt til fengsel for hatefulle ytringar og grovt trygdebedrageri, ein dom som blei oppretthalde 27. juni, ifølgje NTB.