Владимир Путин туучылар санының минималь коэффициентын атады

Россия Президенты Владимир Путин туучылар санының минималь коэффициенты бер хатын-кызга 2,1 бала тәшкил итәргә тиеш, дип белдерде. Бу хакта ул Удмуртия Республикасы башлыгы Александр Бречалов белән очрашу вакытында әйтте, дип хәбәр итә ТАСС.

Бречалов хәбәр иткәнчә, Удмуртиядә хәзерге вакытта туучылар саны күрсәткече 1,39 тәшкил итә – Идел буе федераль округындагы уртача күрсәткечтән бераз югарырак, әмма Россиядәге уртача күрсәткечтән түбәнрәк.

«Безнең өчен бу бик амбициоз чакыру. 2030 елга коэффициент 1,6 булырга тиеш», – дип билгеләп үтте төбәк башлыгы. Ул уңай тенденция күзәтелә – күп балалы гаиләләр саны арта, дип өстәде.

«Туучылар санының суммар коэффициенты югарырак булырга тиеш, әлбәттә. Хәтта 2030 елга да бу аз. Ләкин мин моңа ирешү дә җиңел булмаганын аңлыйм, әмма 2,1 булса да булырга тиеш», - дип ассызыклады Путин.