جرمني ۴۳ عراقي کډوال په یوه چارتر الوتکه کې بغداد ته واستول

جرمني پرون سه شنبه ۴۳ عراقي پناغوښتونکي په یوه چارتر الوتکه کې له لایپزیک ښاره بغداد ته واستول.

دا په جرمني کې د تیرې فبرورۍ میاشتې له ټاکنو وروسته لومړی ځل دی چې دومره لوی شمیر کې کډوال عراق ته ایستل کیږي.

د جرمني (ډي.پي.اې ) خبري اژانس د دغه هېواد د کورنیو چارو د وزیر الکساندر دوبرینت په حواله ویلي، دا کار د هغې تګلارې یوه برخه ده چې د کډوالو د بیرته ستنولو، نورو هېوادونو سره د تړونونو او قاچاق وړونکو سره د مبارزې په هدف جوړه شوې.

جرمني د تیرې جمعې په ورځ ۸۱ افغان پنا غوښتونکي هم چې دوی مجرمان وبلل، کابل ته واستول.

د هغو کډوالو له ایستلو وروسته جرمني د طالبانو دوه قونسلي ماموران هم په خپل هېواد کې ومنل چې د کډوالو د بیرته ستنیدو په چارو کې ورسره له نژدې همکاري وکړي.

دغه طالب ډيپلوماتان چې نومونه یې نه دي اخیستل شوي، برلین ته رسیدلي دي.