Татарстан командасы «ЮНФЛОТ–2025» бөтенроссия хәрби-спорт уенында җиңде

Яшел Үзәннең «Витязи» командасы 29 июльдә Санкт-Петербургта тәмамланган «ЮНФЛОТ–2025» бөтенроссия хәрби-спорт уены финалында җиңү яулады. Ярышларда бөтен Россиядән иң көчле яшь армия коллективлары катнашты.

«ЮНФЛОТ» финалында катлаулы сынаулар программасы әзерләнгән иде: диңгез эстафетасы, ату, спорт ориентлашуы, каршылыклар тактик полосасын узу, шулай ук Россиянең хәрби-диңгез тарихына багышланган интеллектуаль тур.

«Витязи» командасы барлык юнәлешләрдә дә югары нәтиҗә күрсәтте. Егетләр яхшы физик әзерлеген, теоретик белемнәрен һәм нык команда рухын күрсәтте.

Мондый дәрәҗәле ярышта җиңү – күп айлык эшнең һәм тырышлыкның нәтиҗәсе.

Уңышны катнашучыларның шәхси мотивациясе генә түгел, ә Татарстан Яшь армиясе штабының актив ярдәме белән алып барылган системалы әзерлек тә тәэмин итте.

ТР Яшь армиясенең төбәк штабы җитәкчесе генерал-майор Александр Бородин команданың чыгышын югары бәяләде.

«Витязи» командасы җиңеп кенә калмады – ул Россиянең барлык яшь армиячеләре өчен югары планка куйды. Сез – безнең горурлыгыбыз һәм илебезнең киләчәге!» - дип билгеләде ул.

Видео: Татарстан Республикасы Яшь армиясе төбәк штабы җитәкчесе Александр Бородин