Калифорнияда 30 минг гектар ўрмон ёнмоқда
АҚШнинг Калифорния штатида кучли ўрмон ёнғинлари юз бермоқда. АБC хабарига кўра, ёнғинни ўчириш учун 1000 нафардан ортиқ қутқарувчилар сафарбар этилган.
Олов асосан Санта-Барбара ва Сан-Луис-Обиспо округларида жойлашган Лос-Падрес миллий боғи ҳудудини қамраб олган. Ёнғин ҳозиргача 30 минг гектардан ортиқ майдонни ёндириб юборган.
Маҳаллий ҳукумат вакиллари маълум қилишича, ёнғин натижасида 3 киши ҳалок бўлган, жабрланган ҳудудлардан эса аҳоли эвакуация қилинмоқда. Ҳозирда 460 та турар-жой ва бошқа объектлар хавф остида экани таъкидланмоқда.
Ёнғин 1-август куни бошланган ва ҳозиргача тўлиқ назоратга олинмаган. Ҳароратнинг баландлиги ва кучли шамол ёнғиннинг тез тарқалишига олиб келмоқда. Мутасаддилар аҳолига хавфсизлик чораларига қатъий риоя қилишни тавсия қилмоқда.