Татарстан Әфганстанга продукцияне турыдан-туры җибәрә башларга мөмкин
Татарстан делегациясенең Әфганстанга эш визиты кысаларында Кабулда файдалы казылмалар чыгару һәм эшкәртү, шулай ук Татарстаннан продукция экспортлау белән шөгыльләнүче сәнәгать компанияләре җитәкчеләре арасында очрашулар узды.
«Бүгенге көндә Әфганстан Татарстан продукциясен арадашчы фирмалар чылбыры аша сатып ала. Россиянең Әфганстан ислам әмирлеген тануы турыдан-туры логистика төзү мөмкинлеген ачты, бу чыгымнарны киметергә һәм экспортлана торган продукциянең сыйфатын контрольдә тотуны арттырырга мөмкинлек бирәчәк», – дип уртаклашты «Татар-информ» журналисты белән Әфганстандагы Россия эшлекле үзәге башлыгы Рөстәм Хәбибуллин.
Ул билгеләп үткәнчә, бу – Татарстан белән Әфганстан арасында сәүдә-икътисади мөнәсәбәтләрне үстерү өчен мөһим момент.