Ринат Галиәкбәров Мәскәүдә «Татар кухнясы серләре» гастрономия спектаклен тәкъдим итәчәк
19 августта Мәскәүдә Татарстан мәдәнияте көннәре кысаларында «Татар кухнясы серләре» иммерсив гастрономия спектакле була. Бу хакта Татарстанның Россиядәге Тулы вәкаләтле вәкиллеге матбугат хезмәте хәбәр итә.
Спектакльне шеф-повар, өйдә татар ризыклары әзерләү буенча курс оештыручы Ринат Галиәкбәров тәкъдим итәчәк.
Чара кулинария буенча мастер-класс кына түгел, ә чын мәгънәсендә милли мәдәният, традицияләр һәм кулинария сәнгате дөньясы белән танышу да булачак.
Ринат Галиәкбәров - танылган аш-су остасы Юныс Әхмәтҗановның укучысы. Юныс Әхмәтҗанов - 60-70нче елларда сирәк рецептлар җыеп һәм онытылган ризыкларны кире кайтарып, татар кухнясына җан өргән кеше.
Башлана - 18.30 сәгатьтә.