Аэродромнарны реконструкцияләү өчен авиапассажирлардан 150 сум алыначак
Россия Транспорт министрлыгы бер авиапассажирдан 150 сум күләмендә инфраструктура өчен җыем алу кагыйдәләрен билгеләде, аның акчасы аэродромнарны реконструкцияләүгә юнәлдереләчәк. Карарның тиешле проектында җыемның 2026 елның 1 мартыннан үз көченә керергә һәм 2032 елның 1 мартына кадәр гамәлдә булырга мөмкинлеге белдерелә. Бу хакта «ТАСС» хәбәр итә.
Документ нигезендә, җыемны авиакомпанияләр түләячәк, ә аны туплау һәм куллану белән «Гражданнар аэропортлары (аэродромнар) администрациясе» ФДУП шөгыльләнәчәк. Аэропортлар төркемнәргә берләштерелә, ә һәр төркемнең җыелган акчасы аерым банк счетында саклана һәм бары тик тиешле аэродромнарның инфраструктурасын яхшырту өчен генә файдаланылачак.
Транспорт министрлыгы шулай ук бер пассажирдан җыем күләмен исәпләү формуласын билгеләде: база ставкасы 150 сум тәшкил итә, шул ук вакытта формулага инфляция дәрәҗәсе һәм төзәтү коэффициенты салынган, ул гадәттәгечә берәмлеккә тигез, әмма РФ Хөкүмәте карары белән үзгәртелергә мөмкин.