Бір мезетте бірнеше елден зейнетақы алғандарға қандай жаза қолданылады

Қазақстанның Еңбек және халықты әлеуметтік қорғау министрі Светлана Жақыпова Мәжілістегі брифингте бір мезгілде бірнеше елден зейнетақы алған азаматтарға қандай жаза қолданылатынын айтты, - деп хабарлайды Tengrinews.kz тілшісі.
Министрдің сөзінше, олар үшін тек бір жаза бар – заңсыз алынған бюджет қаржысын қайтару.

"Еңбек министрлігінде азаматтың Қазақстаннан қашан заңсыз кеткені туралы – қашан тіркеуден шыққаны, қанша уақыт елде тұрмағаны жайлы дерек жоқ. Келтірілген шығын көлемін құзырлы орган мен Қаржы мониторингі агенттігі анықтауы тиіс", – деді Жақыпова.

Министрдің сөзінше, барлық материалдар тиісті органдарға берілген. Қазіргі таңда тергеу жүріп жатыр.

"Ең үлкен жаза – қалған өмірінде қаражатты қайтадан орнына қою. Заң мен тәртіп бүкіл қоғамда жұмыс істеуі керек", – деп қосты министр.

Айта кетейік, бұған дейін министр бірден үш елден қатар зейнетақы алған жағдайлар тіркелгенін хабарлаған болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!