Нукусда ўқув машғулоти пайтида 10 нафар ҳарбий жароҳатланди
Нукус шаҳрида миллий гвардияга қарашли дала ўқув майдонида нохуш ҳодиса рўй берди. 10 сентябр куни ташкил этилган амалиёт машғулоти чоғида портловчи махсус воситанинг шнури кутилмаганда детонацияга учраб, кичик портлаш содир бўлгани маълум қилинди.
Олинган маълумотларга кўра, ушбу воқеа натижасида машғулотда иштирок этаётган 10 нафарга яқин ҳарбий хизматчи турли даражадаги тан жароҳатларини олган. Зудлик билан ҳодиса жойига тиббиёт хизматлари жалб этилган ва барча жабрланганларга биринчи тиббий ёрдам кўрсатилган.
Масъуллар айтишича, кўрилган зарур чоралар натижасида ҳарбий хизматчиларнинг саломатлиги хавфсиз ҳолатга келтирилган ва уларнинг соғлиғи изчил равишда тикланмоқда.
Айни пайтда, ушбу ҳолат юзасидан хизмат текшируви бошланган. Мутасадди раҳбарлар ва масъул комиссия томонидан ҳодисанинг аниқ сабабларини ўрганиш ишлари олиб борилмоқда.