Трамп Исроилнинг Қатарга зарбасини «ақлсиз қарор» деб баҳолади

The Wall Street Journal нашри хабар беришича, АҚШ президенти Доналд Трамп Исроил бош вазири Бинямин Нетаняҳу билан телефон орқали суҳбат чоғида Қатар пойтахти Доҳада ҲАМАС раҳбарларига зарба бериш қарорини «ақлсиз қадам» деб атаган.

Газета манбаларига кўра, зарба берилган кун икки давлат етакчилари орасидаги телефон мулоқоти жуда кескин кечган. Нетаняҳу суҳбат пайтида Трампга зарба бериш учун жуда қисқа имконият бўлганини ва шу сабабли у шошилинч қарор қабул қилганини айтган. Шу куннинг ўзида уларнинг иккинчи телефон мулоқоти нисбатан илиқ ва дўстона руҳда ўтгани қайд этилган. Манбаларга кўра, Трамп ўша пайтда Нетаняҳудан зарба кутилган натижа берган-бермаганини сўраган.

Шу билан бирга, Қатар бош вазири Муҳаммад бин Абдул Раҳмон бин Жассим Ал Тани CNN телеканалига берган интервюсида Исроилнинг Доҳадаги ҲАМАС етакчиларига йўналтирилган зарбаси «ҳозирда гаровда сақланаётган исроилликларни озод қилишга боғлиқ барча умидни йўққа чиқарди», дея баёнот берди.

Мазкур воқеа халқаро майдонда кенг муҳокамаларга сабаб бўлиб, турли мамлакатлар бунга турлича муносабат билдирмоқда. Айрим таҳлилчилар бу ҳаракат минтақадаги инқирозни янада чуқурлаштириши мумкинлигини таъкидлашмоқда.