Қашқадарёда қалбаки алкоголь маҳсулоти сотмоқчи бўлганлар тўхтатилди
Қашқадарё вилоятида қалбаки спиртли ичимликларнинг ноқонуний айланишига қарши йўналтирилган тадбир амалга оширилди. Бош прокуратура ҳузуридаги Департаментнинг Гузор туман бўлими ва туман Ички ишлар бўлими ходимлари ҳамкорлигида ўтказилган тезкор чора-тадбир давомида йирик миқдорда қалбаки алкоголь маҳсулотлари мусодара қилинди.
Маълумотларга кўра, фуқаро А.Х. ўзининг “Дамас” русумли автомашинасида 3 хил турдаги, жами 750 дона қалбаки аксиз маркалари билан таъминланган спиртли ичимликларни Деҳқонобод тумани ҳудудига олиб киришга уринган. Унинг режаси – ушбу маҳсулотларни ноқонуний равишда савдога чиқариш бўлган.
Ҳуқуқ-тартибот органлари томонидан ўз вақтида амалга оширилган чоралар натижасида барча маҳсулотлар ашёвий далил сифатида ҳужжатлаштирилиб, давлат фойдасига олиб қўйилди.
Маълум қилинишича, ушбу ҳолат юзасидан Ўзбекистон Республикаси Жиноят кодексининг 176-моддаси – “Қалбаки пул, аксиз маркаси ёки қимматли қоғозлар ясаш ва уларни муомалага чиқариш” моддаси бўйича жиноят иши қўзғатилди. Айни пайтда тергов ҳаракатлари олиб борилмоқда ва барча тафсилотлар ўрганилмоқда.