Фәйзуллин төзелеш уку йортларын тәмамлаучылар өчен мәҗбүри эшләүне кертергә тәкъдим итте

Россия төзелеш һәм торак-коммуналь хуҗалык министры Ирек Фәйзуллин 100+ TechnoBuild ХІІ Халыкара төзелеш күргәзмәсенең пленар утырышында чыгыш ясады. Ул бюджет акчасы хисабына белем алучы төзелеш югары уку йортлары студентлары өчен мәҗбүри эшләүне кертергә чакырды. Бу хакта РИА Новости хәбәр итә.

Төзелеш институтын тәмамлаганнан соң юллама алган кешенең үз тәҗрибәсенә сылтама ясап, министр «бюджетта белем алган яшь белгеч күпмедер вакыт эшләргә тиеш» дип санавын белдерде.

«Бүген илебездә кайбер медицина белгечлекләре буенча шундый ук карарлар кабул ителде инде», – дип искәртте Фәйзуллин.

Шул ук вакытта Россия Төзелеш һәм торак-коммуналь хуҗалык министрлыгы җитәкчесе аның тәкъдимен гамәлгә ашыруны кыенлаштыра торган катлаулыклар булуын да таныды. Эш шунда ки, аның бәяләвенчә, Россия төзелеш тармагында дәүләт структуралары калмаган диярлек, ә торак-коммуналь хуҗалыкта булган резерв яшь белгечләрне эш урыннары белән тәэмин итү өчен җитәрлек булмаска мөмкин.

Министр фикеренчә, төзелеш югары уку йортларының бюджет бүлекләрен тәмамлаган чыгарылыш укучылары төбәк оешмаларына бүленергә тиеш. Моннан тыш, ул үзе җитәкләгән ведомствода профильле югары уку йортларында һәм көллиятләрдә белем бирү дәвамлылыгын кыскарту мәсьәләсе турында фикер алышу булуын хәбәр итте.