د افغانستان او بنګله دیش کریکټ لوبډلې نن دویمه شل اوریزه لوبه لري
د افغانستان او بنګله دیش د کریکټ ملي ټیمونه نن جمعه د شل اوریزو لوبو د لړۍ په دویمه لوبه کې سره مخامخ کیږي.دغه لوبه د کابل په وخت د ماښام په ۷ بجو د شارجې په کریکټ ستډیوم کې ترسره کیږي.پرون د دغې لوبلړۍ لومړنۍ لوبه کې افغانستان بنګله دیش ته لوبه بایلوده.افغانستان سیالې لوبډلې ته د ۱۵۲ منډو هدف ورکړ، خو بنګله دیشي لوبډلې په نولسم اور کې هدف پوره کړ او لوبه یې په ۴ ویکټو او ۸ بالونو سره وګټله.دریمه شل اوریزه لوبه به د یکشنبې په ورځ ترسره شي.دواړه ټیمونه د یو ورځنیو لوبو درې مسابقې هم کوي چې هغه لوبلړۍ د اکتوبر په اتمه پیلېږي.