Сан-Хосе Эртўвейкс Вернер учун пешқадамга айланди

«РБ Лейпциг» ҳужумчиси Тимо Вернер яқин орада Европани тарк этиши мумкин. Аввалроқ герман футболчисига «Интер Майами» қизиқиш билдираётгани ҳақида хабарлар тарқалган эди, бироқ МЛСдаги яна бир клуб — «Сан-Хосе Эртўвейкс» ҳам музокараларга киришди.

Журналист Флориан Плеттенберг маълумотига кўра, Калифорния клуби 29 ёшли форвард билан аллақачон музокара ўтказган. Айни пайтда Вернер трансфери бўйича энг асосий даъвогар сифатида «Сан-Хосе Эртўвейкс» кўрилмоқда.

Вернер жорий мавсумда «РБ Лейпциг» сафида деярли майдонга тушмаяпти — у бор-йўғи икки дақиқа ўйнаган. Футболчининг «қизил буқалар» билан амалдаги шартномаси 2026 йил ўрталаригача мўлжалланган ва у узайтирилмайди.