Дидье Дешам The Best овоз беришида Дембелени биринчи қўйди

Франция терма жамоаси бош мураббийи Дидье Дешам “Йилнинг энг яхши футболчиси” номинацияси бўйича ўз овозини жамоасининг вакилларига берди. Сешанба куни бўлиб ўтган The Best маросимида соврин “Пари Сен-Жермен” ҳужумчиси Усмон Дембелега насиб этди.

Madrid Zone хабарига кўра, Дешам “учранглилар” устози сифатида қатнашган овоз беришда ҳам Дембелени биринчи ўринга қўйди. Мутахассис рўйхатида иккинчи ўринни Мадриднинг “Реал” клуби футболчиси Килиан Мбаппе эгаллади.

Учликни эса “Пари Сен-Жермен” аъзоси, марокашлик ҳимоячи Ашраф Ҳакими якунлади. Дидье Дешам 2012 йилдан буён Франция терма жамоасини бошқариб келади.

Мураббий 2026 йилги жаҳон чемпионати якунланганидан сўнг лавозимни тарк этишни режалаштирмоқда.