Бруну Фернандеш Аморим билан муносабатлари ҳақида гапирди

«Манчестер Юнайтед» сардори Бруну Фернандеш жамоа бош мураббийи Рубен Аморим билан муносабатлари ҳақида фикр билдирди. «Биз чегарани белгилаб олганмиз, уни ошиб кетмасликка ҳаракат қиламиз.

Аммо қаердадир кичик изоҳ беришим керак бўлса, буни бошқа футболчилар олдида қилмасликка интиламан. Аморим ишда жуда жиддий инсон, мен ҳам шундайман.

У футболчиларнинг фикри ва қалбига янада чуқурроқ кириб боришга, муносабатлар “мураббий – ўйинчи”дан кўра “инсон – инсон” шаклига яқинроқ бўлишига интилаяпти», деди Фернандеш Canal 11 нашрига берган интервьюсида. Ҳозирда «Манчестер Юнайтед» Англия Премьер-лигаси турнир жадвалида олтинчи ўринда бормоқда.