Туркия Суперлигасида бу мавсум 12 мураббий истеъфога чиқарилди

Туркия Суперлигасида мавсум давомида 18 клубдан 12 тасида бош мураббийлар алмашди. Trendyol Superlig эълон қилган бу рақам маҳаллий клублар раҳбариятининг сабри қанчалик қисқа эканини яққол кўрсатади.

Ишидан бўшатилган мутахассислар орасида португалиялик Жозе Моуриньо ҳам бор. У кейинчалик "Фенербахче"дан "Бенфика"га ўтди.

Шунингдек, "Бешиктош"дан бўшатилган норвегиялик Уле Гуннар Сульшер ҳозирча янги иш топгани йўқ. Айни пайтда "Фенербахче" чемпионатда иккинчи, "Бешиктош" эса бешинчи ўринда бормоқда.

Қайд этилишича, ишдан олинган мураббийлар ўрнига тайинланган 12 мутахассиснинг учтаси ҳам кўп ўтмай лавозимини тарк этган. Мавсум охиригача қанча мураббий ўз ўрнини сақлаб қола олиши ҳозирча номаълум.