NASA Қуёшни илк бор бундай аниқликда кўрсатди

NASAнинг PUNCH миссияси Қуёш ҳақида илгари кузатилмаган даражада батафсил тасвирларни тақдим этди. Расмий маълумотга кўра, космосда тахминан 13 минг километр масофада жойлашган тўртта кичик сунъий йўлдош биргаликда “виртуал телескоп” сифатида ишлаб, Қуёшнинг ташқи атмосфераси — тож ва қуёш шамолини бир бутун ҳолда суратга олишга муваффақ бўлган.

Жануби-ғарбий тадқиқот институти раҳбарлигида амалга оширилаётган миссия ишга туширилганидан атиги бир йил ўтиб муҳим натижалар берди. Хусусан, ноябрда АҚШ ҳудуди бўйлаб қутб нурларини келтириб чиқарган кучли қуёш бўрони батафсил кузатилди. Бу маълумотлар космик об-ҳавони яхшироқ англаш ва олдиндан башорат қилишга хизмат қилади.

Тизим Қуёшдан ажралиб чиқадиган плазма булутлари — коронал масса отилишлари ва қуёш шамолининг ҳаракатини аниқ кўрсатмоқда. Шунингдек, бошқа телескоплар илғай олмайдиган кучсиз ва ноёб кометалар ҳам аниқланган, жумладан қарийб 40 кун кузатилган юлдузлараро комета.

Мутахассислар таъкидлашича, илғор камералар Қуёш нурини триллион мартадан ортиқ сусайтириб, жуда нозик жараёнларни ҳам очиб бермоқда. Бу эса Қуёш тизимидаги яқин муҳитимизни янада чуқурроқ тушуниш имконини яратади.