Туризм қўмитасига янги раис тайинланди

Ўзбекистон туризм бошқарув тизимида кадрлар ўзгариши юз берди. Бу ҳақда Podrobno.uz хабар беради.

Туризм қўмитаси раиси Умид Шодиев лавозимидан озод қилинди ва унинг ўрнига Абдулазиз Аккулов тайинланди. Маълум қилинишича, Умид Рустамович Шодиев бошқа ишга ўтиши муносабати билан лавозимни тарк этган.

У 2023 йил 27 июлдан буён қўмитага раҳбарлик қилиб келаётган эди. Янги раис Абдулазиз Уролбоевич Аккулов 1985 йилда туғилган, Тошкент давлат иқтисодиёт университетини тамомлаган ва иқтисодиёт ҳамда халқаро туризм менежменти соҳасида мутахассис ҳисобланади.

У турли йилларда "Ўзбектуризм" миллий компанияси тизимида раҳбарлик лавозимларида ишлаган, Туризмни ривожлантириш давлат қўмитаси раиси ўринбосари, шунингдек, Туризм ва спорт вазири ўринбосари лавозимларини эгаллаган. Кейинчалик у Ўзбекистоннинг Бирлашган Араб Амирликларидаги Фавқулодда ва Мухтор элчиси этиб тайинланган эди.

Абдулазиз Аккуловнинг туризм тизимига қайтиши билан соҳанинг ривожланиши, халқаро ҳамкорликни кенгайтириш ва мамлакат туризм салоҳиятини тарғиб қилиш ишлари янги суръат олиши кутилмоқда.