Темур Кападзенинг “Навбаҳор”ни танлаш сабаби маълум бўлди

“Навбаҳор” клуби бош мураббийи лавозимига тайинланган Темур Кападзе айни пайтда жамоани янги мавсумга тайёрлаш ишларини жадал давом эттирмоқда. Машғулотлар Ўзбекистон Футбол ассоциацияси тасарруфидаги Миллий футбол марказида ўтказилмоқда. Жамоанинг тайёргарлик жараёнлари билан яқиндан танишган Sports.uz нашри янги бош мураббий билан суҳбат уюштириб, унинг қарори ортидаги асосий омилларни аниқлади.

Кападзенинг таъкидлашича, у фақатгина “Навбаҳор”дан эмас, балки бошқа жамоалардан ҳам таклиф олган. Бироқ айнан наманганликлар билан ишлаш қарори осон қабул қилинмаган бўлса-да, ўзи учун энг тўғри танлов бўлган.

“Бошқа клублардан ҳам чақирувлар бор эди. Лекин нега айнан уларни рад этганимни ҳозир очиқлашни истамайман. “Навбаҳор” эса икки йил давомида менга жиддий қизиқиш билдириб келди. Раҳбарият билан бир неча бор мулоқот қилдик. Аммо ҳал қилувчи омил — мухлислар бўлди. Уларнинг ишончи ва талабчанлиги жуда юқори эканини ҳис қилдим. Шу боис таклифни қабул қилишга қарор қилдим”, — деди мутахассис.

Шунингдек, Темур Кападзе италиялик машҳур ҳимоячи ва Ўзбекистон миллий жамоаси бош мураббийи Фабио Каннаваро ҳақида ҳам ўз фикрлари билан ўртоқлашди. Унинг сўзларига кўра, Каннаваро билан мулоқот унда ижобий таассурот қолдирган.

“Каннаваро — яхши инсон ва ўз касбини мукаммал биладиган мутахассис. Унда салбий жиҳат кўрмадим. Фаолиятига фақат омад тилайман”, — дея қўшимча қилди Кападзе.

Маълумот учун, "Навбаҳор" янги мавсум олдидан катта мақсадларни олдига қўйган. Клуб раҳбарияти, мухлислар ва жамоа янги бош мураббий билан биргаликда юқори натижаларни қайд этишга ишонч билдирмоқда. Наманганлик ишқибозлар эса Кападзенинг танловини умид ва ишонч билан қарши олмоқда.