Игорь Комаров Идел буе халкын Яңа ел белән котлады
Россия Президентының Идел буе федераль округындагы Тулы вәкаләтле вәкиле Игорь Комаров Идел буе федераль округы төбәкләрендә яшәүчеләрне якынлашып килүче Яңа ел һәм Раштуа белән котлады. Аның сүзләрен матбугат хезмәте китерә.
2025 елга йомгак ясап, вәкаләтле вәкил аның Бөек Җиңүнең 80 еллыгы билгесе астында узуын һәм Ватанны саклаучылар елы булуын искәртте.
«Бөек Ватан сугышы турындагы истәлек бүген аеруча мөһим. Ул тәрбиядә, мәктәп һәм студентлар проектларында һәм гаилә архивларында. Без тыныч тормышның югары бәясен аңлыйбыз һәм ата – бабаларыбызның батырлыгын хәтерлибез», - дип билгеләде Комаров.
Ул ассызыклаганча, Идел буеннан дистәләгән мең сугышчы махсус хәрби операциядә катнаша, ә йөзләрчә мең волонтер аларга ярдәм күрсәтә. Вәкаләтле вәкил геройларның гаиләләре турында кайгырту өстенлекле булып кала, дип ышандырды.
Социаль-икътисади үсешне бәяләп, Игорь Комаров узып баручы елны бай ел дип атады. Округ төбәкләрендә яңа производстволар, медицина һәм мәгариф учреждениеләре ачылды, юллар, парклар һәм яр буйлары яңартылды.
«Безнең округ – илнең төп үсеш үзәкләренең берсе: төбәкләр илкүләм проектларда катнаша, сәнәгатьне һәм авыл хуҗалыгын үстерә, студентлар өчен яңа технопарклар һәм кампуслар төзи, мәгълүмат технологияләрен һәм ясалма интеллект кертә. Заводлар дәүләт оборона заказын үтиләр, безнең хәрбиләр өчен кирәкле бөтен нәрсәне җитештерәләр», – дип белдерде Игорь Комаров.
Вәкаләтле вәкил 2026 елда округ халкына сәламәтлек, мәхәббәт, тотрыклылык һәм иртәгәге көнгә ышаныч теләде.