Ду корманди БДА дар Варзоб зери тарма монда, ҷон бохтанд

Ду корманди Раёсати бозрасии давлатии автомобилӣ (БДА) дар ноҳияи Варзоб зери тарма монда, ҷон бохтаанд. Ҳодиса 1-уми январ рух додааст.

Ду манбаи огоҳ аз қазия ба Радиои Озодӣ гуфтанд, Фаррух Ҳасанзода ва Саидмурод Ғанизода барои ба танзим даровардани ҳаракати нақлиёт дар роҳи Душанбе-Чаноқ ба минтақаи Варзоб сафарбар шуда буданд ва дар вақти иҷрои вазифаҳои хизматӣ зери тарма монданд.

Як манбаъ дар Кумитаи ҳолатҳои фавқулодаи Тоҷикистон бо тасдиқи ин хабар гуфт, ҷасади ду афсарро аз зери тарма бароварда, ба наздикон доданд.

Дар назар аст, ки 2-юми январ маросими видоъ бо Фаррух Ҳасанзода дар ноҳияи Фирдавсии шаҳри Душанбе ва ҷанозаи Саидмурод Ғанизода дар зодгоҳаш ноҳияи Файзобод баргузор шавад.

Намояндагони ширкати IRS, ки масъули нигоҳбини роҳи Душанбе-Чаноқ ҳастанд, то ҳол қазияро шарҳ надодаанд.

Давоми як ҳафтаи ахир ҳаракати нақлиёт дар роҳи Душанбе-Чаноқ, ягона масир миёни пойтахт ва шимоли кишвар мушкил шудааст.

Ширкати IRS мегӯяд, боридани барфи зиёд ва фаромадани тарма ҳаракати нақлиётро мушкил кардааст. Дар наворҳое, ки ба шабакаҳои иҷтимоӣ роҳ ёфт, дида мешавад, ки мошинҳои зиёде дар роҳ дармондаанд.

Масъулияти нигоҳбонии роҳи Душанбе-Чаноқ ба ӯҳдаи ширкати IRS аст ва ширкат барои ин кораш аз ронандагон маблағ мегирад. Молики ширкат маълум нест.