Пенсионерларны милеккә салымга ташлама алу мөмкинлеге турында искәрттеләр

Пенсионерлар милеккә салымга ташлама алырга – һәр төрдәге берәр объект өчен салым түләүдән азат ителергә хокуклы. Бу хакта RT Дәүләт Думасы депутаты Алексей Говыринга сылтама белән хәбәр итә.

«Бу бер фатир яки бүлмә, бер торак йорт, бер гараж яки машина кую урыны, шәхси ярдәмче хуҗалык, бакчачылык, яшелчәчелек участогындагы 50 квадрат метрга кадәр мәйданлы бер хуҗалык корылмасы була ала»,-дип билгеләп үткән парламентарий.

Говырин аңлатканча, объект пенсионерның исеменә рәсмиләштерелгән булырга һәм эшкуарлык эшчәнлегендә кулланылмаска тиеш. Әгәр кешенең бер төрдәге ике объекты булса, ул кайсы объектка карата ташлама кулланырга икәнен сайларга тиеш була.

«Экономияләнгән сумма күләме кадастр бәясенә һәм җирле ставкага бәйле булачак. Еш очракта бу елына берничә мең сум. Әмма мәгълүматлар туры килмәү һәм гаризаны соңарып бирү аркасында проблемалар килеп чыгарга мөмкин, шуңа күрә бу мәсьәләгә игътибар белән карарга кирәк», – дип кисәтте Говырин.