Рафинья «Барселона» ўтган мавсумдаги натижани такрорлай олади

«Барселона» вингери Рафинья Диас Испания Суперкубоги финалида «Реал» устидан қозонилган ғалабадан сўнг жамоанинг мавсумдаги имкониятлари ҳақида фикр билдирди. Бу ҳақда euro-football.ru хабар беради.

Бразилиялик футболчи «эл класико»да «қаймоқранглилар» дарвозасига икки бор йўл топиб, «кўк-анорранглилар»га жорий кампаниядаги илк совринни олиб келишда муҳим рол ўйнади. Финал 3:2 ҳисобида якунланди.

«Биз ўтган мавсумдаги муваффақиятни қайтаришимиз мумкин. Кўряпманки, жамоа анча улғайди, янада кучли бўлиш учун ҳаммаси бор. Аввалги мавсумда эришганларимизни яна уддалай оламиз — бу кўпроқ ўзимизга боғлиқ. Биз тўлиқ диққатни жамлаганмиз», — деди Рафинья финалдан кейинги интервьюсида.

Эслатиб ўтамиз, 2024/25 мавсумида «Барселона» Испания Суперкубоги, мамлакат кубоги ва Ла Лигани қўлга киритган, Чемпионлар лигасида эса ярим финалгача етиб борган.