Ҳоланд "Сити"нинг мағлубиятини тан олди: “Бу шармандалик, айб менда”
УЕФА Чемпионлар лигаси умумий босқичининг 7-турида «Манчестер Сити» Норвегияда «Будё-Глимт»га 1:3 ҳисобида мағлуб бўлгач, жамоа ҳужумчиси Эрлинг Ҳоланд учрашувдан кейинги энг кескин ва очиқ чиқишлардан бирини қилди. Норвегиялик тўпурар бу сафар баҳоналар изламади — аксинча, барча масъулиятни ўз зиммасига олишини қатъий таъкидлади.
Ҳоланднинг айтишича, бундай пайтда нафақат ёшлар, балки тажрибали етакчилар ҳам олдинга чиқиб, жавобгарликни ҳис қилиши шарт. У Родри, Жанлуижи Доннарумма ва Тижани Рейндерс каби ўйинчиларни мисол қилиб келтириб, “жамоадаги ҳар бир катта фигура ўз ҳиссасини очиқ тан олиши керак” деган мазмунда фикр билдирди.
«Мен бутун жавобгарликни ўз зиммамга оламан. Родри, Жижи (Доннарумма), Тижани (Рейндерс) каби тажрибали футболчилар ҳам шундай йўл тутиши керак. Ҳеч кимни айбламоқчи эмасман, аммо бу етарли эмас. Бизда масъулият ҳисси кучлироқ бўлиши шарт. Биз «Манчестер Сити»миз — ютмаслигимиз мумкин эмас. Бу ҳолат оддий эмас», — деди Ҳоланд.
Энг таъсирли жиҳати — у гол ура олмагани учун алоҳида узр сўради. Ҳоланднинг сўзларида оддий “узр” эмас, балки ҳақиқий ички оғриқ бор эди: Будё шаҳрига келиб жамоани қўллаб-қувватлаган ҳар бир мухлис олдида ўзини қарздор ҳис қилгани сезилди. У бу натижани “шармандалик” дея баҳолаб, қандай сўз топиш ҳам қийинлашганини яширмади.
«Менда тайёр жавоб йўқ. Гол ура олмаганим учун барча айбни ўз зиммамга оламан. «Сити»нинг ҳар бир мухлисидан, Будёгача етиб келиб бизга мухлислик қилган ҳар бир инсондан кечирим сўрайман. Бу — уят. Ростини айтсам, нима дейишни билмайман, фақат узр сўрашим мумкин.
Ҳиссиётларимни муҳокама қилишни истамайман. Майдонга тушганимда ҳар доим максимумни бераман. Ўйинлар жуда кўп, лекин бу — менинг касбим. Энди тўрт кундан кейин яна баҳс бор, демак хатоларни тўғрилаб, ўзимизни қайта йиғишга уринамиз», — деди Ҳоланд TNT Sportsга берган интервьюсида.
Бу сўзлар «Сити» мухлислари учун ҳам оғир, ҳам муҳим сигнал: жамоа ичкарисида мағлубиятни “тасодиф” деб ўтириш йўқ. Энди энг қизиғи — майдондаги жавоб. Чунки катта клубларда гап кўп бўлиши мумкин, лекин мухлислар бир нарсани кутган: кейинги ўйинда “Сити” ҳақиқатан ҳам ўзини “нормал ҳолат”га қайтарсин.