Глушаков Россия ва Сенегал ўртасидаги ўйинни аъло ғоя деб билди
“Спартак” ва “Локомотив”нинг собиқ ярим ҳимоячиси Денис Глушаков Россия ҳамда Сенегал терма жамоалари ўртасида ўртоқлик учрашуви ўтказилиши эҳтимолига муносабат билдирди. Бу ҳақда euro-football.ru хабар беради.
Аввалроқ Сенегал футбол федерацияси президенти Абулайе Фал бундай баҳсни ташкил этиш имконияти борлигини айтганди.
Глушаковнинг фикрича, Сенегал каби кучли жамоа билан ўйнаш Россия термаси учун жуда фойдали бўлади: бу ҳам яхши спарринг, ҳам жамоанинг реал кучини синовдан ўтказадиган учрашув. Унинг сўзларини “Советский спорт” келтирди.
Маълумот учун, Сенегал яқинда Африка миллатлар кубогини қўлга киритди. Финалда Садио Мане етакчилигидаги жамоа Марокашни 1:0 ҳисобида мағлуб этган.