Жикия агенти ҳимоячининг келажаги ҳақида гапирди
"Антальяспор" футболчиси Георгий Жикия агенти Владимир Кузьмичёв россиялик ҳимоячининг клубдаги ҳолати борасида фикр билдирди. Бу ҳақда euro-football.ru хабар беради.
Кузьмичёвнинг айтишича, Жикиянинг аҳволи яхши ва жамоа унда жиддий режаларга эга. Сўнгги учрашувларда майдонга тушмагани эса микрожароҳат билан боғлиқ бўлган. Ҳозир футболчи тикланган ва агентнинг фикрича, кейинги ўйинда яна сафга қайтади.
Аввалроқ ОАВда турк клуби "Спартак"нинг собиқ сардори билан хайрлашмоқчи экани ҳақида хабарлар тарқалган эди.
Жикия жорий мавсум Туркия чемпионатида 12 та ўйинда қатнашиб, 2 та гол урди. Унинг "Антальяспор" билан шартномаси 2027 йил ўрталаргача амал қилади.