«Фенербаҳче» собиқ футболчиси Моуринёни танқид қилди ва ваъдасини эслатди

«Фенербаҳче» собиқ футболчиси Линкольн бош мураббий Жозе Моуринёнинг ўзига нисбатан тутумидан норози эканини билдириб, португалиялик мутахассисни танқид қилди. Моуринё Истанбул клубини 2024–2025 йилларда бошқарган. Бу ҳақда euro-football.ru хабар беради.

Линкольннинг айтишича, мураббий унга берган ваъдасида турмаган ва бу ҳолатни ҳурматсизлик деб қабул қилган. Футболчи ижара асосида «Халл Сити» жамоасига кетишидан олдин Моуринё билан гаплашгани, у эса ёзги йиғинга Португалияга чақиришини айтганини таъкидлади. Бироқ Англиядаги мавсум тугагач, у йиғинга таклиф кутган, таржимон орқали боғланмоқчи бўлганида эса Моуринё мулоқотдан бош тортиб, спорт директорига мурожаат қилишни айтган.

Линкольннинг сўзларига кўра, жамоа Португалияда йиғин ўтказаётган пайтда у ҳам Португалияда бўлган, шунга қарамай Моуринё уни Истанбулга қайтариб, алоҳида машғулот ўтказишни буюрган. У бу қарорни адолатсиз ва ҳурматсиз муносабат сифатида баҳолаб, клуб учун кўплаб ўйинларда ўз позициясида бўлмаса ҳам бор кучи билан ҳаракат қилганини, оғир жароҳатдан кейин эса етарли қўллаб-қувватлов кўрмаганини қўшимча қилди.

Маълумот учун, ҳозирда Жозе Моуринё «Бенфика» клубини бошқармоқда.