Ҳайкин «Ман Сити» устидан ғалабани Норвегия спорти тарихи деди
Норвегиянинг «Буде-Глимт» клуби дарвозабони Никита Ҳайкин «Манчестер Сити»га қарши кутилмаган ғалаба ҳақида фикр билдирди. Бу ҳақда euro-football.ru хабар беради.
Чемпионлар Лигаси умумий босқичининг 7-турида норвеглар инглиз грандини 3:1 ҳисобида мағлуб этди.
Ҳайкиннинг айтишича, ўйиндан кейин ҳам жамоа ўзлари XXI аср футбол индустриясидаги энг кучли тизимлардан бирини енгганини дарҳол англаб етмаган. У бу баҳс нафақат клуб, балки барча норвеглар ва умуман Норвегия спорти учун тарихий воқеа бўлганини таъкидлади.
Дарвозабон бу натижани ўз фаолиятидаги энг муҳим ғалабалардан бири сифатида ҳам қайд этди.
Ҳозирда «Буде-Глимт» Чемпионлар Лигаси турнир жадвалида 6 очко билан 28-ўринда бормоқда.