Гранеро Арбелоадан мамнун, асосий пойдевор қўйилди

Мадриднинг «Реал» клубида тўп сурган Эстебан Гранеро Альваро Арбелоанинг «қироллик клуби»даги бош мураббийлик ишига баҳо берди. Бу ҳақда euro-football.ru хабар беради.

Гранеро фикрича, Арбелоа узоқ муддатли режа зарурлигини яхши тушунади ва бу режанинг таянчи садоқат, мустаҳкамлик ҳамда тинмас меҳнатдан иборат. «Жамоада жуда ижобий энергия бор. У ҳали кўп нарсани қуриши керак, аммо энг муҳим ишлар аллақачон қилиб бўлинди», — деди у DAZNга.

Эслатиб ўтамиз, Арбелоа январ ойида Хаби Алонсонинг ўрнини эгаллаган эди. 43 ёшли мутахассис қўл остида «Реал» барча мусобақаларда ўтказилган 7 учрашувнинг 5 тасида ғалаба қозонди.

Ҳозир мадридликлар Ла Лига жадвалида иккинчи ўринда бормоқда ва пешқадам «Барселона»дан бир очко ортда қолмоқда.