«Ан-Наср» мураббийи Роналдуга навбатдаги ўйинда дам беради

«Ан-Наср» бош мураббийи Жорже Жезуш Криштиану Роналдунинг нега яқинлашиб келаётган учрашувда майдонга тушмаслигини изоҳлаб берди. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигаси доирасида «Аркадаг»га қарши баҳс олиб боради. Португалиялик юлдуз ҳужумчи тез орада майдонга қайтиши кутилаётган бўлса-да, айнан шу ўйинда у яна таркибда бўлмайди.

Жезушнинг таъкидлашича, жамоа зич тақвим сабаб Роналдуни ва асосий таркибдаги яна бир қатор футболчиларни асрашга қарор қилган. Мураббий бунга олдинда турган муҳим «Ал-Фатех»га қарши учрашувни сабаб қилиб кўрсатди.

Al Nassr Zone келтирган иқтибосга кўра, Жезуш Роналдунинг дам олиши янгилик эмаслигини ҳам қайд этган: у Саудия Арабистонидан ташқарида ўтадиган айрим ўйинларни аввал ҳам ўтказиб юборган.

Саудия чемпионати доирасидаги «Ал-Фатех» — «Ан-Наср» учрашуви шанба куни, 14-февраль куни бўлиб ўтади.